کراچی: سندھ اسمبلی کے بجٹ اجلاس میں پاکستان پیپلز پارٹی کے رکن اسمبلی ہری رام کشوری لعل نے زرعی شعبے کو درپیش مسائل پر توجہ دلاتے ہوئے کہا کہ زراعت اس وقت شدید مشکلات کا شکار ہے اور کاشتکاروں کو مناسب ریلیف فراہم کرنے کے لیے عملی اقدامات کی ضرورت ہے۔
انہوں نے مطالبہ کیا کہ فصلوں کی کٹائی سے قبل ہی زرعی اجناس کے نرخ مقرر کیے جائیں تاکہ کسانوں کو اپنی محنت کا مناسب معاوضہ مل سکے اور انہیں مارکیٹ میں غیر یقینی صورتحال کا سامنا نہ کرنا پڑے۔
ہری رام کشوری لعل نے کہا کہ جمڑاؤ کینال ایسٹ کی لائننگ کی اشد ضرورت ہے تاکہ پانی کے ضیاع کو روکا جا سکے اور زرعی زمینوں کو بہتر انداز میں سیراب کیا جا سکے۔
انہوں نے دیہی علاقوں میں بجلی کے مسائل کا ذکر کرتے ہوئے کہا کہ بعض مقامات پر غیر قانونی کنڈوں کے ذریعے صارفین سے رقم وصول کی جا رہی ہے، جس کا نوٹس لیا جانا چاہیے اور شفاف نظام کو یقینی بنایا جانا چاہیے۔
رکن اسمبلی نے مطالبہ کیا کہ میرپورخاص ڈویژن میں ایک میڈیکل یونیورسٹی قائم کی جائے تاکہ خطے کے طلبہ کو طبی تعلیم کی بہتر سہولیات میسر آ سکیں اور صحت کے شعبے میں مقامی سطح پر افرادی قوت تیار کی جا سکے۔
انہوں نے کہا کہ زراعت، تعلیم اور بنیادی سہولیات کے شعبوں میں مزید سرمایہ کاری وقت کی ضرورت ہے تاکہ عوامی مسائل کا مؤثر حل ممکن بنایا جا سکے۔
