پاکستان نے بھارتی طیاروں کے لیے فضائی حدود کی بندش میں مزید ایک ماہ کی توسیع کر دی

کراچی: پاکستان نے بھارتی رجسٹرڈ طیاروں کے لیے اپنی فضائی حدود کی بندش میں مزید ایک ماہ کی توسیع کر دی ہے، جس کے بعد یہ پابندی تقریباً دس ماہ سے برقرار ہے۔ پاکستان ایئرپورٹس اتھارٹی نے اس حوالے سے نیا نوٹم جاری کر دیا ہے۔
نئے اعلامیے کے مطابق بھارتی رجسٹرڈ فوجی اور سول طیاروں کو 23 مارچ تک پاکستانی فضائی حدود استعمال کرنے کی اجازت نہیں ہوگی۔ یہ پابندی اپریل 2025 سے نافذ ہے۔
یہ اقدام اُس وقت کیا گیا تھا جب بھارت نے پہلگام واقعے کے بعد سندھ طاس معاہدہ معطل کیا تھا، جس کے بعد دونوں ممالک کے درمیان کشیدگی میں اضافہ ہوا۔ جواباً پاکستان نے بھارتی ایئرلائنز کے لیے اپنی فضائی حدود بند کر دی تھی، جبکہ بعد ازاں بھارت نے بھی پاکستانی طیاروں کے لیے اپنی فضا بند کر دی۔
مئی 2025 میں دونوں ممالک کے درمیان مسلح تصادم کے بعد جنگ بندی طے پائی، تاہم فضائی پابندیاں برقرار رہیں۔ ذرائع کے مطابق بھارتی ہوا بازی کے شعبے کو اس بندش سے نمایاں مالی نقصان ہوا، جبکہ پاکستان پر اس کے اثرات محدود رہے۔
ماضی میں بھی 1999 کی کارگل کشیدگی اور 2019 کے پلوامہ بحران کے دوران اسی نوعیت کی فضائی پابندیاں عائد کی گئی تھیں۔