وفاقی وزیر دفاع خواجہ آصف نے کہا ہے کہ پاکستان کی معیشت شدید بحران کے مرحلے سے نکل کر استحکام کی جانب بڑھ رہی ہے، جبکہ آئندہ ایک سے دو برس میں ملکی معاشی شرح نمو 6 سے 7 فیصد تک پہنچنے کی امید ہے۔

قومی اسمبلی میں مالی سال 2026-27 کے بجٹ پر بحث کے دوران خطاب کرتے ہوئے خواجہ آصف نے کہا کہ موجودہ حکومت کے آغاز پر ملک کو ڈیفالٹ کے خطرے کا سامنا تھا، تاہم بہتر معاشی فیصلوں اور پالیسی اقدامات کے ذریعے صورتحال کو سنبھالا گیا۔

انہوں نے کہا کہ اب معیشت “آئی سی یو” کی حالت سے نکل چکی ہے اور استحکام کی طرف بڑھ رہی ہے۔ حکومت کی کوشش ہے کہ معاشی نظام کو مزید مضبوط بنایا جائے تاکہ ترقی کے مواقع پیدا ہوں۔

وزیر دفاع نے پٹرولیم مصنوعات کی قیمتوں میں کمی کا فائدہ عوام تک منتقل کرنے کی یقین دہانی بھی کرائی۔ ان کا کہنا تھا کہ ملک میں ایسا ٹیکس نظام ضروری ہے جو شفاف، منصفانہ ہو اور عوام کو ٹیکس ادائیگی کی طرف راغب کرے۔

خواجہ آصف نے ملکی سفارتی کامیابیوں کا ذکر کرتے ہوئے کہا کہ دانشمندانہ فیصلوں اور مؤثر خارجہ پالیسی کے باعث پاکستان کا عالمی سطح پر مقام بہتر ہوا ہے۔

انہوں نے وزیراعظم شہباز شریف، چیف آف ڈیفنس فورسز فیلڈ مارشل سید عاصم منیر اور قومی قیادت کے کردار کو بھی سراہا۔

آزاد جموں و کشمیر کی صورتحال پر گفتگو کرتے ہوئے وزیر دفاع نے کہا کہ خطے سے متعلق فیصلے منتخب نمائندوں اور اسمبلی کے ذریعے ہونے چاہئیں، کسی دباؤ کے تحت نہیں۔

انہوں نے کہا کہ سیاسی معاملات میں بیرونی اثراندازی کی کوششیں قابل قبول نہیں، جبکہ تمام جائز مسائل آئینی اور جمہوری طریقہ کار کے ذریعے حل کیے جا سکتے ہیں۔

خواجہ آصف نے قومی اتحاد پر زور دیتے ہوئے کہا کہ مختلف ثقافتوں اور برادریوں کے لوگ دہائیوں سے پاکستان میں مل جل کر رہ رہے ہیں، اس لیے قومی یکجہتی کے معاملات کو سیاسی اختلافات کی نذر نہیں کرنا چاہیے۔