کولمبو: آئی سی سی ٹی20 ورلڈ کپ 2026 کے سپر ایٹ مرحلے میں آج پاکستان اور انگلینڈ کی ٹیمیں آمنے سامنے ہوں گی، جہاں یہ میچ قومی ٹیم کی سیمی فائنل تک رسائی کی امیدوں کے لیے انتہائی اہم قرار دیا جا رہا ہے۔
نیوزی لینڈ کے خلاف پریماداسا اسٹیڈیم میں بارش کے باعث میچ منسوخ ہونے کے بعد پاکستان ٹیم ایک بار پھر بھرپور تیاری کے ساتھ میدان میں اترنے کے لیے تیار ہے۔ منسوخ میچ نے اگرچہ قومی ٹیم کو اہم مومینٹم سے محروم کیا، تاہم کھلاڑی اب انگلینڈ کے خلاف سخت مقابلے کے لیے پُرعزم دکھائی دیتے ہیں۔
دوسری جانب انگلینڈ نے سپر ایٹ مرحلے کا آغاز شاندار انداز میں کیا اور میزبان سری لنکا کے خلاف کم اسکور کا کامیاب دفاع کرتے ہوئے گروپ میں پہلی پوزیشن حاصل کرلی۔ پوائنٹس ٹیبل پر انگلینڈ سرفہرست ہے جبکہ پاکستان اور نیوزی لینڈ ایک، ایک پوائنٹ کے ساتھ قریب موجود ہیں، جب کہ سری لنکا ابھی تک کوئی پوائنٹ حاصل نہیں کر سکا۔ اس صورتحال میں آج کا مقابلہ سیمی فائنل کی دوڑ میں نہایت فیصلہ کن حیثیت اختیار کر گیا ہے۔
میچ کندی کے پالی کیلے انٹرنیشنل کرکٹ اسٹیڈیم میں کھیلا جائے گا جہاں کی پچ روایتی طور پر اسپن بولرز کے لیے مددگار سمجھی جاتی ہے۔ توقع ہے کہ میچ آگے بڑھنے کے ساتھ وکٹ پر ٹرن اور گرفت میں اضافہ ہوگا، جو پاکستانی اسپن اٹیک کے لیے فائدہ مند ثابت ہوسکتا ہے۔ذرائع کے مطابق پاکستان ٹیم انتظامیہ انگلینڈ کے خلاف اسپن بولنگ پر مبنی حکمت عملی اپنانے کا ارادہ رکھتی ہے تاکہ مڈل اوورز میں دباؤ بڑھا کر حریف بیٹنگ لائن کو مشکلات سے دوچار کیا جا سکے۔
ٹی20 انٹرنیشنل مقابلوں میں پاکستان کو انگلینڈ پر برتری حاصل ہے، جہاں گرین شرٹس نے 28 میں سے 18 میچ جیتے جبکہ 10 میں شکست ہوئی۔ تاہم 2022 کے ٹی20 ورلڈ کپ فائنل میں انگلینڈ کے ہاتھوں شکست کی یاد ابھی تک پاکستانی کیمپ میں موجود ہے، جس کے باعث یہ میچ بدلہ چکانے کے جذبے سے بھی اہم سمجھا جا رہا ہے۔ ٹورنامنٹ میں اب تک 220 رنز کے ساتھ نمایاں کارکردگی دکھانے والے اوپنر صاحبزادہ فرحان نے کہا کہ ان کنڈیشنز میں اسپن بولنگ پاکستان کا اہم ہتھیار ثابت ہوگی۔ ان کے مطابق ٹیم پُراعتماد ہے اور چیلنج کے لیے مکمل تیار ہے۔ کندی میں موسم صاف رہنے کی پیشگوئی کی گئی ہے جس سے دونوں ٹیموں کو اپنی حکمت عملی پر مکمل عمل درآمد کا موقع ملے گا۔ روشنیوں میں کھیلا جانے والا یہ مقابلہ نہ صرف پوائنٹس بلکہ وقار اور سیمی فائنل کی امیدوں کے لیے بھی فیصلہ کن ثابت ہوسکتا ہے۔
