پاکستان مسلم لیگ (ن) کے صدر نواز شریف نے آزاد جموں و کشمیر (اے جے کے) کی صورتحال پر تشویش کا اظہار کرتے ہوئے مظاہرے ختم کرنے اور تمام فریقین کو بامعنی مذاکرات شروع کرنے کی اپیل کی ہے۔
لاہور میں پارٹی اجلاس کی صدارت کرتے ہوئے نواز شریف نے آزاد کشمیر کے سیاسی اور انتظامی حالات کا جائزہ لیا۔
نواز شریف نے کہا کہ ملک کے تمام مسائل آئینی دائرے میں رہتے ہوئے حل ہونے چاہئیں، جبکہ سیاسی اور عوامی حقوق کے لیے جمہوری طریقہ اختیار کیا جانا چاہیے۔
انہوں نے کہا کہ آزاد کشمیر میں موجودہ صورتحال پیدا نہیں ہونی چاہیے تھی، تمام سیاسی جماعتوں، آزاد کشمیر حکومت اور وفاق کو مل کر امن بحال کرنے کے لیے کردار ادا کرنا ہوگا۔
مسلم لیگ (ن) کے صدر نے احتجاج ختم کرنے پر زور دیتے ہوئے کہا کہ برداشت، ہم آہنگی اور جمہوری اقدار کو فروغ دینا وقت کی ضرورت ہے۔
اجلاس میں آزاد کشمیر کے حالیہ واقعات میں جانی نقصان پر افسوس کا اظہار کیا گیا اور جاں بحق افراد کے لیے دعا کی گئی۔
نواز شریف نے کہا کہ مسلم لیگ (ن) ہمیشہ آزاد کشمیر کے عوام کے آئینی حقوق، فلاحی اقدامات اور ترقیاتی منصوبوں کو ترجیح دیتی رہی ہے۔
انہوں نے مسئلہ کشمیر پر پارٹی کے مؤقف کو دہراتے ہوئے کہا کہ مقبوضہ کشمیر کے عوام کو اقوام متحدہ کی قراردادوں کے مطابق حق خودارادیت ملنا چاہیے۔
نواز شریف نے کشمیری عوام پر زور دیا کہ وہ پاکستان کے ساتھ اپنے تعلق کو برقرار رکھتے ہوئے امن اور سیاسی طریقہ کار کو ترجیح دیں۔
