اسلام آباد ہائیکورٹ نے £190 ملین کیس میں سزا کے خلاف اپیلوں کے معاملے پر جیل حکام کو ہدایت کی ہے کہ پاکستان تحریک انصاف کے بانی عمران خان اور ان کی اہلیہ بشریٰ بی بی کے دستخط شدہ وکالت نامے حاصل کرکے وکلا کو فراہم کیے جائیں۔

اسلام آباد ہائیکورٹ کے چیف جسٹس سرفراز ڈوگر اور جسٹس محمد آصف پر مشتمل دو رکنی بینچ نے کیس کی سماعت کی۔

سماعت کے دوران عمران خان اور بشریٰ بی بی کے وکیل بیرسٹر سلمان صفدر نے عدالت کو بتایا کہ مختلف مقدمات میں وکلا مقرر ہیں، تاہم جیل حکام کی جانب سے دستخط شدہ وکالت نامے فراہم نہیں کیے گئے۔

وکیل نے مؤقف اختیار کیا کہ وہ اپنے مؤکلین سے مشاورت کرنا چاہتے ہیں اور اپیل کے لیے ضروری دستاویزات درکار ہیں۔

عدالت نے ریمارکس دیے کہ اگر اپیل کنندگان کسی اور فورم سے رجوع کرنا چاہتے ہیں تو انہیں دستخط شدہ دستاویزات ملنی چاہئیں۔

سماعت کے دوران بتایا گیا کہ بشریٰ بی بی کو آنکھوں کا مسئلہ بھی درپیش ہے، جس کے باعث وکیل ان سے ملاقات کرنا چاہتے ہیں۔

اسلام آباد ہائیکورٹ نے متعلقہ حکام کو حکم دیا کہ سات روز کے اندر عدالتی حکم پر عمل درآمد یقینی بنایا جائے اور دستخط شدہ وکالت نامے فراہم کیے جائیں۔

عدالت نے £190 ملین کیس میں عمران خان اور بشریٰ بی بی کی سزاؤں کے خلاف اپیلوں کی سماعت جون کے آخری ہفتے میں مقرر کر دی۔

£190 ملین کیس میں نیب کی جانب سے الزام عائد کیا گیا تھا کہ برطانیہ کی نیشنل کرائم ایجنسی سے موصول ہونے والی رقم سے متعلق معاملات میں بے ضابطگیاں ہوئیں، تاہم عمران خان اور دیگر نے الزامات کی تردید کی ہے۔