فرانسیسی صدر ایمانوئل میکرون نے اعلان کیا ہے کہ فرانس کئی دہائیوں بعد پہلی بار اپنے جوہری ہتھیاروں کی تعداد میں اضافہ کرے گا اور ضرورت پڑنے پر جوہری صلاحیت رکھنے والے طیارے عارضی طور پر اتحادی ممالک میں تعینات بھی کیے جا سکیں گے۔ انہوں نے شمال مغربی فرانس کے فوجی اڈے ایل لانگ میں خطاب کرتے ہوئے کہا کہ عالمی سطح پر آزاد رہنے کے لیے طاقتور اور بااثر ہونا ضروری ہے۔ میکرون کے مطابق یہ نیا منصوبہ یورپ کو بڑھتی ہوئی عالمی کشیدگی کے دوران زیادہ خودمختار اور محفوظ بنانے کے لیے ہے، تاہم تخفیفِ اسلحہ کے حامی حلقوں نے اس فیصلے پر تنقید کی ہے۔ انہوں نے واضح کیا کہ جوہری ہتھیاروں کے استعمال کا حتمی اختیار صرف فرانس کے پاس رہے گا۔ برطانیہ، جرمنی، پولینڈ، نیدرلینڈز، بیلجیم، یونان، سویڈن اور ڈنمارک اس وقت دفاعی تعاون پر بات چیت کر رہے ہیں، جبکہ جرمن چانسلر فریڈرک مرز کے ساتھ مشترکہ بیان میں کہا گیا کہ دونوں ممالک دفاعی اشتراک کو مزید مضبوط کریں گے اور جرمنی فرانسیسی جوہری مشقوں میں بھی شریک ہوگا۔ فرانس دیگر یورپی ممالک کو بھی دفاعی مشقوں میں شامل ہونے کی اجازت دے گا