بلوچستان کے ضلع پشین میں خفیہ اطلاعات کی بنیاد پر کیے گئے ایک آپریشن (آئی بی او) کے دوران پانچ دہشت گرد ہلاک کر دیے گئے، پاک فوج کے شعبہ تعلقات عامہ (آئی ایس پی آر) نے پیر کے روز بتایا۔

آئی ایس پی آر کے بیان کے مطابق سیکیورٹی فورسز نے دہشت گردوں کے پورے گروہ کو مؤثر انداز میں نشانہ بنایا، جس کے نتیجے میں شدید فائرنگ کا تبادلہ ہوا۔

بیان میں کہا گیا کہ اس دوران ایک خودکش بمبار نے خود کو دھماکے سے اڑا لیا جبکہ بھارت کی سرپرستی میں سرگرم مزید چار خوارج کو کارروائی کے دوران ہلاک کر دیا گیا۔

ہلاک دہشت گردوں کے قبضے سے اسلحہ، گولہ بارود اور دھماکا خیز مواد بھی برآمد کیا گیا۔ یہ عناصر علاقے میں متعدد دہشت گرد کارروائیوں میں ملوث رہے تھے۔

آئی ایس پی آر کے مطابق علاقے میں مزید کسی بھی بھارتی سرپرستی میں سرگرم دہشت گرد کی موجودگی کے خاتمے کے لیے کلیئرنس اور سرچ آپریشن جاری ہے۔

بیان میں مزید کہا گیا کہ سیکیورٹی فورسز اور قانون نافذ کرنے والے ادارے “عزمِ استحکام” وژن کے تحت دہشت گردی کے مکمل خاتمے تک اپنی کارروائیاں بھرپور انداز میں جاری رکھیں گے۔

واضح رہے کہ خیبر پختونخوا اور بلوچستان، جو افغانستان سے متصل ہیں، 2021 میں طالبان کے افغانستان میں دوبارہ اقتدار سنبھالنے کے بعد سے دہشت گردی سے زیادہ متاثر رہے ہیں۔

اس سے قبل رواں ماہ بھارت کی حمایت یافتہ تنظیم فتنہ الہندوستان — بلوچستان لبریشن آرمی (بی ایل اے) نے بلوچستان کے مختلف علاقوں میں حملے کیے تھے، جن میں آئی ایس پی آر کے مطابق 36 معصوم شہریوں (بشمول خواتین) اور 22 سیکیورٹی اہلکاروں نے جامِ شہادت نوش کیا۔

اس کے ردعمل میں سیکیورٹی فورسز نے آپریشن ردّالفتنہ 1 شروع کیا جس کے دوران مختلف کارروائیوں اور کلیئرنس آپریشنز میں کم از کم 216 دہشت گردوں کو ہلاک کیا گیا۔

31 جنوری کو دہشت گردوں نے کوئٹہ، مستونگ، نوشکی، دالبندین، خاران، پنجگور، تمپ، گوادر اور پسنی میں شہریوں کو نشانہ بنایا تھا۔

ان حملوں کی امریکا، برطانیہ، سعودی عرب، قطر، ترکیہ، ایران، متحدہ عرب امارات، فرانس، کینیڈا، یورپی یونین، او آئی سی اور اقوام متحدہ کی سلامتی کونسل سمیت کئی ممالک اور عالمی اداروں نے شدید مذمت کی۔